Alt klart for nytt settefiskanlegg: – Me treng ikkje sprenge ein einaste stein

Selskapet ABM har fått løyve til å starte opp eit nytt landbasert settefiskanlegg ved marinaområdet på Atløy i Askvoll kommune. Med ferdig planert tomt, stålhall og djupvasskai på plass, startar arbeidet med vidare utbygging umiddelbart.

I februar 2025 fekk ABM tildelt løyve frå Vestland fylkeskommune for produksjon av 4000 tonn postsmolt av laks, aure og regnbogeaure. Det er gründer Ove Vilnes som står bak selskapet, og han er svært tilfreds med avgjerda.

– Vi set pris på denne tillitserklæringa frå sektormyndigheitene og verdset deira evne til å vurdere kvalitetane våre i søknaden, seier Vilnes.

Han fortel at prosjektet har fått positive tilbakemeldingar frå lokalsamfunnet.

RAS-teknologi

Anlegget blir bygd på land, og produksjonen skal skje ved bruk av avsaltet sjøvatn kombinert med resirkuleringsteknologi (RAS). 

Alt prosessvatn skal reinsast før utslepp. Dette gir ei kontrollert og miljøvennleg driftsform, med stabile forhold for fisken og utan påverknad på livet i sjøen utanfor.

Byggeklar tomt og eksisterande infrastruktur 

Anlegget skal etablerast på eit ferdig regulert industriområde, eigd av Atløy Båt & Marina. Tomta på 8000 kvadratmeter er ferdig planert, og ein stålhall for karproduksjon er oppført. 

Området kan utvidast til 18 000 kvadratmeter, og det finst djupvasskai på 50 meter som gjer det mogleg å ta imot store fartøy.

– Vi treng ikkje sprenge ein einaste stein for å starte opp, seier Vilnes.

Vidare framdrift og opne løysingar 

Det har vore arbeidd med prosjektet i fem år, og no startar hovudprosjektering og vidare utbygging. Vilnes vurderer fleire alternativ for gjennomføringa: å byggje ut i eiga regi, i samarbeid med ein etablert oppdrettsaktør, eller sal til ein aktør som ønskjer å ta prosjektet vidare. 

Til dette arbeidet vil selskapet nytte eksterne rådgjevarar.